將臨期「醒寤」 - Shung Tak Catholic English College

Mini: 大家好，我哋係Catholic Society。喂Mina，乜你睇落去咁垂頭喪氣㗎，都就嚟到聖誕啦。

Mina:唉，我一諗到就嚟到年尾，回顧番成年，發現有好多事都做得唔好，就覺得好後悔。好似年頭明明同朋友相處得好好，但之後又因為一啲小事鬧交，講咗啲令佢哋傷心嘅說話，搞到最後形同陌路咁。又好似有時面對家人嘅噓寒問暖，會因為自己嘅情緒唔好，用惡劣嘅態度回應。

Mini: 哦～不過，你呢種內疚嘅心情，其實同今日將臨期第二主日嘅主題好貼切呀

Mina: 係咩？我淨係記得上星期嘅主題係「醒寤」，要我哋多啲留意自己既言行，以及同身邊既人既相處。

Mini: 醒寤只係第一步，當我哋意識到自己做錯事嘅時候，更重要嘅係我哋有冇勇氣向天主及他人懺悔，決心用實際行動去改過。而因悔改呢個字太常見，反而有時會令我哋忽略佢背後深遠既意義。其實，當我哋意識到自己有不足嘅地方，內心產生嗰份想改變嘅渴望，就已經係悔改嘅第一步㗎啦。

Mina: 唉，有邊個又唔想渴望改變呀，個個都想自己每一方面可以做得好啲。但係，正所謂知易行難，有時我哋就算知道要悔改，都唔知點開始好

Mini: 正因為咁，將臨期就俾咗我哋一個好好嘅契機。你睇下將臨環上嘅蠟燭，都唔係一次過點晒，而係每個主日點一支，令我地可以一步一步咁去悔改。身位天主教徒，我地會特別喺呢段時間辦修和聖事，透過意識到自己的錯誤，向天主明認，並表達自己願意悔改。神父會代表天主赦免人嘅罪，令人因此修補自己同天主嘅關係。

Mina：而我地尚未成為天主教徒嘅同學仔，都邀請大家都可以由一小步開始，開始反思自己喺過往一年，不論係思言行為上嘅不當又或是人際關係上嘅不足。當我哋發現到自己嘅過失後，最重要嘅就係好好反省如何改過。可能容易同人有磨擦嘅同學，可以改變自己對他人嘅態度，例如平時待人寬和啲，從一小步做起，為自己定立目標。悔改唔係淨係指向後悔、內疚既心態，更加需要作出實際行動去配合，徹底咁將錯既事改翻好！同埋都要提醒自己唔好再犯嗰啲過失。

Mini: 要承認錯誤係需要勇氣，改過錯失更需要決心，讓我地都借將臨期呢個機會，好好反思自己既自己既行為，當意識到有犯過錯既地方，願我地都能夠有堅定既意志同勇氣去改過，遠離容易令我地犯罪既人同事，並從錯誤中學習。

Mina: 而家就讓我地一齊祈求天主既帶領，並特別俾我哋勇氣去面對誘惑同自己既軟弱，有願意定改既心，準備自己迎接你既降生。