凡你們對我這些最小兄弟中的一個所做的，就是對我做的 (瑪 25:40)

Katrina+Evelyn：大家好，我哋係Catholic Society

K: 話說四旬期喺啱啱既新年假期間已經開始咗喇喎。Evelyn 你又知唔知道四旬期係咩呢？

E：緊係知啦，我有留心聽之前既catso express㗎！四旬期，顧名思義總共為40日，40呢個數字喺聖經當中有更新、預備嘅意思，耶穌曾經喺曠野對抗魔鬼誘惑，禁食祈禱四十日，所以喺四旬期，天主教徒都會特別效法耶穌，透過祈禱、守齋、克己去準備心靈，力行愛德，為復活節做好準備。

K：無錯啦，講到克己，佢唔止係「食少啲甜品」、「打少啲機」咁簡單，而係鍛煉我哋唔被欲望控制既意志，騰出空間去關心身邊嘅人。就好似琴日開始傳嘅呢個四旬期捐款盒仔，我哋可以選擇放棄買一件自己想要既物品既金錢，捐贈比有需要既窮人。或者我哋有時會覺得自己只係捐少少錢，唔能夠帶嚟啲咩改變，但其實捐款既意義唔在於金額嘅多少，更重要既喺背後既動機同態度。就好似路加福音記載，當耶穌見到一位窮寡婦將自己僅有既兩文錢捐出嚟既時候，佢特別稱讚呢位婦人，認為呢位婦人捐出既錢比所有人都要多，因為當所有人都係將自己多餘既錢捐出嚟既時候，婦人係將自己有既一切都全然奉獻，呢兩文錢所展現既係佢既對天主既信心同對人既愛德，哪怕自己都面對著貧困，仍樂意為他人作出犧牲。

E：耶穌傳教既時侯亦都以自己為榜樣，話比我地知真正既愛德應該發自願意關懷同體諒既心，從而推動我地付以實質既行動去傳達愛。例如耶穌曾經醫好痲瘋病人，痲瘋病係傳染性極高既病，所以佢地都係被社會遺棄嘅人，不受歡迎。但當耶穌見到個位痲瘋病人跪低求耶穌幫佢既時候，即使痲瘋病人被視為唔潔淨，無人敢掂，耶穌都冇迴避，更加伸手撫摸佢，表示對佢既愛、關懷同憐憫。耶穌對人既愛係打破所有標籤同偏見，佢願意愛我地每一個人，特別係社會上弱小窮困既人。

K：四旬期既開始提醒我哋要反思生活，學習節制，並以簡樸既心去實踐愛德工作。或者我哋未必能夠好似寡婦一樣奉獻所有，但我哋都可以用小小既行動去幫助他人，例如關心孤單的同學、將慳翻黎嘅錢捐助比有需要的人、參加義工服務。當我哋願意尊重每一個人嘅尊嚴，特別係最容易被忽略嗰啲，其實亦係守護人性嘅價值。而喺信仰入面，我哋更相信當我哋為最小既一個兄弟所做既，就係為天主所做。所以都邀請大家喺呢個四旬期入面，用實際行動，無論係捐款、服務定只係一啲簡單但真誠既問候，多啲去關懷身邊既弱勢社群，嘗試以愛同慷慨回應天主。

Catholic Society