Home › Prayers › 「苦路」是什麼?

「苦路」是什麼?

Mika：Joe，你冇事阿嗎？做咩喺度周圍拜黎拜去啊？你係咪有咩煩惱啊？唔怕講出黎喎。

Joe ：唔係啊！我喺度拜緊苦路啊。上次Catso Express咪提過四旬期係為期40日，等信友可以係呢段時間，好好準備心靈去迎接耶穌基督嘅復活嘛。咁其實除左守齋之外，我地都會拜苦路嘅~

Mika：講起拜苦路，不如就等我考下你對佢有幾多認識啦！你知唔知「苦路」總共有幾多處啊？

Joe ：呢題咁容易，我梗係知啦！14處吖嘛！我仲知第一處係耶穌被判死刑添。

Mika：咦？識啲野喎！咁你知唔知「苦路」嘅由來同埋意義係咩先？

Joe ：errrrrrr。。。你今次又真係考起我啦~ 我唔知喎~

Mika：唔知唔緊要，等我話比你知啦。拜苦路就係指一個紀念耶穌為左救贖人類而被釘係十字架上嘅活動，參加者會喺指定路線配合唔同耶穌苦難嘅畫象做祈禱。喺17世紀嘅時候，方濟會士聖利安納就開始宣揚拜苦路嘅敬禮，最後喺1731年教宗確定左邊14處作為苦路嘅地方同埋敬禮儀式。

Joe ︰嘩~ 原來個禮儀咁耐歷史~ 咁點解又會有14處咁多呢？

Mika︰其實14處苦路係將耶穌苦難嘅過程分做14部分，例如第一處比拉多審判耶穌，第二處耶穌背負十字架，去到最尾一處就係耶穌被埋葬，而每部分都有讀經，默想同祈禱嘅。

Joe ︰但有讀經、祈禱唔係都夠啦咩？點解仲要有默想部份呢？

Mika︰你又唔好咁講，因為默想都係好重要既~ 透過當中嘅默想，我地可以將苦路裏面每一處同自己嘅生活聯繫，更加投入參與禮儀。但最重要都係提醒大家︰耶穌係為左救贖世人先要受苦嘅事實，藉此提醒我地天主對人無私嘅愛同奉獻，並且過程當中，一路反思自己平日有冇實踐天主嘅教誨，就好似係愛人如己，寬恕，克己等等嘅善行。

Joe ︰係咪即係咁，因為呢個禮儀唔單止係紀念耶穌嘅苦難，仲要跟隨佢行走呢段苦路，所以我地並唔係孤零零咁一個人行。而耶穌本來係清白無罪，冇必要受刑，但正正因為佢對我地嘅愛，願意接受一切，忍受所有侮辱同痛苦，將本來應由我地背負嘅十字架放喺自己嘅膊頭上面。

Mika︰冇錯啊！有啲慧根喎！

Joe ：原來拜苦路係咁有意義，等我仲以為周圍拜下就已經算係添，真係失禮曬。

Mika：唔緊要啦，欣賞你有呢份熱誠想了解下，實踐下。不過講起實踐，學校catso黎緊都有拜苦路
嘅活動喎，你有冇興趣黎了解多啲啊？

Joe ：咁好嘅機會點少得我啊？唔知個活動係幾時呢？

Mika︰喺嚟近3月17日（星期五），Catso會喺二樓祈禱室舉行拜苦路，想參加嘅同學就記得
留意我地instagram / 報告版上有關嘅資訊。

Joe ︰希望到時見到大家啦~


Catholic Society
8 March 2023

Scroll to Top