Home › Prayers › 「牡丹雖好，都要有綠葉扶持」

「牡丹雖好，都要有綠葉扶持」

最近睇咗一個電視節目，一位綠葉演員講述自己過去十幾年既演藝生涯，佢勤勤懇懇謹守工作崗位，奈何出到街，啲人見佢都幾面善，唔少人就會起後面講，呢個咪係「咖厘啡」，有啲甚至會起「咖厘啡」前面加多個「死」字，佢講及呢段經歷既時候，眼裡面不禁流露出委屈同傷感！

「咖厘啡」呢三個字或多或少都係帶住輕蔑，貶低既成份，有欠對人既尊重！常言道：「牡丹雖好，都要有綠葉扶持」，每一個演員都影響住作品既成與敗，因為佢地係一個整體！

梁啟超先生起敬業與樂業裡面講過，「凡職業都是可敬的！」我地每個人都係社會上既一個零件，任憑缺少咗某一個零件，運作起嚟都會出現問題！試想想如果無咗清潔工人幫助我地清潔街道，無咗建築工人幫我地興建房屋，無咗速遞員幫我地運送物件，我地既生活環境會唔會咁好，會唔會咁便捷呢？所以但凡每一個為自己，為家庭，為社會而努力既人，都係值得尊重既！

咁到底咩係尊重呢？尊重有別於禮貌，禮貌係一種表現出嚟既行為，而尊重卻係一種涵養，係一種品德，一種發自內心既情操！唔宣揚別人既隱私，唔嘲笑別人既殘缺，唔會戴有色眼鏡對待唔同階層，唔同種族既人！人與人之間，需要互相尊重，社會才能和諧，懂得尊重別人，先至能夠受人尊重！
第日有機會起街見到綠葉演員，要記住佢地係「演員」而唔係咖厘啡！


Ms. Hui C. Y.
29 April 2022

Scroll to Top